Ferð sigurvegara í Kokkakeppni grunnskóla Reykjavíkur til London

Arnar, Kjartan og Sindri gistu á Bloomsbury Park hotel sem er mjög stutt frá Oxford Street og British Museum ásamt kennara sínum og fararstjóra, Áslaugu Traustadóttur.

Farið var í skoðunarferð í matvæladeild Harrods sem er ein stærsta sælkeraverslun Evrópu ef ekki sú stærsta. Þar smökkuðu allir á ostrum, parmaskinku og fleiri dásemdum auk þess sem verslað var töluvert af konfekti og súkkulaði en súkkulaði og konfekt deild Harrods er ævintýralega flott.

Borðað var á veitingastað Jamie Oliver, Fifteen, en þar starfa unglingar sem hafa helst úr námi af ýmsum ástæðum og fá þeir þar tækifæri til að verða matreiðslumeistarar með stæl.

Meðal annars var borðuð parmaskinka með lífrænt ræktaðri cantaloupe melónu, hægeldað sérræktað lambakjöt, 12 tíma eldað svínakjöt og ýmislegt fleira sem bragðaðist að allra mati ótrúlega vel. Starfsfólkið á Fifteen áritaði matseðla með góðum kveðjum fyrir drengina og södd og sæl fórum við þaðan á National History Museum og skoðuðum meðal annars risaeðlubeinagrindur og fleiri furðulega hluti úr náttúrunni frá upphafi vega.

Þar sem ferðin var í raun bara einn heill dagur og eitt síðdegi komumst við ekki yfir meira en pizzustaðurinn við hlið hótelsins varð fyrir valinu til að borða á seint að kvöldi eftir að rölt hafði verið upp og niður Oxford stræti og verslað eitt og annað í unglingavænum verslunum við aðalverslunargötu London.